കോതമംഗലം: ബ്രെയ്ന്‍ ട്യൂമര്‍ ബാധിതനായി ചികിത്സയില്‍ കഴിഞ്ഞിരുന്ന ബ്ര. ജോസ് കാവുംപുറം നിര്യാതനായി. കോതമംഗലം രൂപതയ്ക്കുവേണ്ടിയുള്ള വൈദികാര്‍ത്ഥിയായിരുന്നു. രാജഗിരി ഹോസ്പിറ്റലില്‍ ചികിത്സയിലായിരുന്നു. ഇന്ന് വെളുപ്പിനാണ് ജോസിന്റെ നില ഗുരുതരമായത്. ഈ വര്‍ഷം നവാഭിഷിക്തനാകുള്ള തയ്യാറെടുപ്പിലായിരുന്നു ബ്ര. ജോസ്.
ചെറുപ്പകാലം മുതല്‍ക്കേ ജോസ് ഒന്നേ ആഗ്രഹിച്ചിരുന്നുള്ളൂ. വൈദികനാകുക. ആ ആഗ്രഹത്തോടെയാണ് സെമിനാരിയില്‍ ചേര്‍ന്നതും. അള്‍ത്താരയില്‍ ബലിയര്‍പ്പിച്ചില്ലെങ്കിലും തന്റെ ജീവിതബലി പൂര്‍ത്തിയാക്കി ബ്ര.ജോസ് മടങ്ങിയിരിക്കുന്നു.
കഴിഞ്ഞ ഏതാനും ദിവസങ്ങളായി സോഷ്യല്‍ മീഡിയായില്‍ ബ്ര. ജോസിന്റെ രോഗാവസ്ഥയും അദ്ദേഹത്തിന് വേണ്ടിയുള്ള പ്രാര്‍ത്ഥനാപേക്ഷകളും പ്രചരിച്ചിരുന്നു. അനേകര്‍ ഈ ബ്രദറിന് വേണ്ടിയുള്ള ആത്മാര്‍ത്ഥമായ പ്രാര്‍ത്ഥനയിലുമായിരുന്നു.
അദ്ദേഹത്തിന്റെ ആരോഗ്യത്തിന് വേണ്ടി പ്രാര്‍ത്ഥിച്ചിരുന്നവര്‍ക്കെല്ലാം നടുക്കവും വേദനയും ഉളവാക്കിക്കൊണ്ടാണ് ബ്ര. ജോസ് നിത്യതയിലേക്ക് മടങ്ങിയിരിക്കുന്നത്.
ബ്ര. ജോസിനെ സന്ദര്‍ശിച്ച ദേവി മേനോന്‍ ഫേസ്ബുക്കില്‍ കുറിച്ചവരികള്‍ ഇങ്ങനെയാണ്.
ഇന്നലെ കണ്ടതേയുളളൂ ഈ മോനേ.. ഈവര്‍ഷം തിരുപ്പട്ടം സ്വീകരിക്കേണ്ടതായിരുന്നു. തമ്പുരാന്റെ ഹിതം നമുക്കറിയില്ലല്ലോ. തീരെ അവശതയില്‍ ആയിരുന്നുവെങ്കിലും ആ മുഖത്തെ ചൈതന്യം അത്ഭുതപ്പെടുത്തും വിധം ആിരുന്നു. ഈശോയുടെ ആ ആത്മാവ് ഈശോയോടൊപ്പമായി.
അതെ നമുക്കും ബ്ര. ജോസിന്റെ ആത്മാവിന്‍റെ നിത്യശാന്തിക്കു വേണ്ടി പ്രാര്‍ത്ഥിക്കാം. ബ്ര. ജോസ് കാവുംപുറത്തിന് മരിയന്‍ പത്രത്തിന്റെ കണ്ണീരില്‍ കുതിര്‍ന്ന യാത്രാമൊഴി.
